പ്രണയത്തിന്റെ കണ്ണടച്ചാ
 സൗഹൃദത്തിന്റെ തൃക്കണ്ണ് തുറന്നെന്നെ കടാക്ഷിക്കുക
ആ കണ്ണുകളുടെ മനോഹാരിതയിൽ,
അതിന്റെ കയത്തിൽ 
ഞാനെന്റെ സ്നേഹത്തെ 
മുക്കിത്താഴ്ത്താം!!!

പുഴയും പൂമരവും

വഴി മാറി ഒഴുകിയ പുഴയറിഞ്ഞുവോ
കടവത്ത് നിന്നിരുന്ന പൂമരം
കാലം തെറ്റി പൂത്തുലഞ്ഞത്‌
പുഴയുടെ തഴുകലേറ്റ്, എവിടേയ്ക്കോ 
ഒത്തുചേർന്നൊഴുകാനായിരുന്നെന്ന്!!

സ്വപ്നം

പുഴയോരത്തൊരു പൂമരം നില്പ്പുണ്ട്
സുഗന്ധം പരത്തിക്കൊണ്ട്
സ്വപ്നമാകുംപൂക്കളുടെ മാസ്മര ഗന്ധം
ഒരു രാവിനപ്പുറംഅക്കരെ മാനം 
തുടുക്കുമ്പോള്‍ അടര്‍ന്ന് 
പുഴയിലേയ്ക്ക് വീണ് എങ്ങാണ്ടെങ്ങാണ്ടേയ്ക്കോ 
ഒഴുകി അകലുന്ന സ്വപ്നപ്പൂക്കൾ!

മറവി

അകലുമ്പോൾ യാത്രാമൊഴി പറയരുത്
അകലേയ്ക്ക് പോയെന്ന്
മനസ്സ് ബോദ്ധ്യപ്പെടുമ്പോൾ
മറവിയെന്ന അനുഗ്രഹത്തിൽ നിന്നെ ഞാൻ ഒളിപ്പിക്കാൻ ശ്രമിക്കാം.

എനിക്കൊളിക്കാന്‍

എനിക്കൊരു ചെറുശംഖു വേണം
അതിനുള്ളിൽ കയറാവുന്നിടത്തോളം ചെറുതാവണം
മനസ്സ് ചുരുങ്ങരുത്,മസ്തിഷ്കം ചുരുങ്ങരുത്
എന്നെ ആരും കാണാതെ
ശംഖിനുള്ളിൽ കടലിരമ്പവുംശ്രവിച്ചെനിക്കൊളിച്ചിരിക്കണം!!

നിനക്കായ്

ഒരു വരി കുറിയ്ക്കണംഎനിക്കിനി
അതിലെന്റെ പ്രാണൻ നിറയ്ക്കണം
ഞാനെന്നില്ലാതാവും നിമിഷത്തില്‍,
അന്ന് നിനക്ക് മാത്രം വായിക്കുവാൻ
ആ വരികളന്നു നിന്നോട് പറയാതെ പറയും
എന്റെ പ്രാണൻ നീയായിരുന്നു...!!

നൊമ്പരം

സൂര്യനോ ചന്ദ്രനോ 

സ്വന്തമെന്നവകാശപ്പെടാനാകാത്ത സന്ധ്യ

ഒരിക്കലും നിത്യമായി 

ഒരുമിക്കാൻ കഴിയാത്ത കടലും കരയും

സാക്ഷാത്ക്കരിക്കാൻ കഴിയാത്ത 

പ്രണയത്തിന്റെ പ്രകൃതിയുടെ ഉദാഹരണങ്ങൾ

ഇണക്കം പിണക്കം

പണ്ട്
ഇൻലാൻഡിൽ ഒരു സ്നേഹവരി

ഇന്ന്
ഒരു മിസ്കാൾ

പിണക്കത്തിൽ നിന്നിണക്കത്തിലേയ്ക്കുള്ള അകലം!!

മോഹം

കടലാഴങ്ങളളോളം
തിരഞ്ഞൊരു 
തരിയോളം ദയ
ഒരു തിരയോളം ഉയർന്നൊരിക്കലും
പൂവണിയാത്ത മോഹങ്ങൾ

സ്നേഹം

തെന്നലായ് അവൻ നിന്നടുത്തെത്താതിരിക്കാനല്ലേ 
ആ ജനവാതിൽ കൊട്ടിയടച്ചത് .
നിന്നിലെയ്ക്കെത്താൻ അരൂപിയായ 
അവനെന്തിന് വാതിലുകള്‍ ...
നീ നല്കിയ സ്നേഹസുഗന്ധ സ്മരണകൾ,
മാത്രം പോരെ ..എവിടെയും നിന്നെ തിരഞ്ഞെത്തുവാന്‍ ..!!!

അതിഥി

എന്റെ വിരസതകളെ ഹനിക്കാനാണ് 
അവയിലെയ്ക്ക് നീ അതിഥിയായി കയ്യേറിയത് 
എന്റെ മൂകതകളെ സഹിച്ചും 
വേദനകളെ തഴുകിയും 
എന്നെ അസ്വസ്ഥയാക്കുമ്പോഴും 
നഷ്ടമായ വിരസതയെ
ഞാന്‍ നിത്യം പ്രണയിച്ചു കൊണ്ടേ ഇരിക്കുന്നു ..!!